+ "Kanapa maka pina taungut Lui? Kada biasa ikam kulihat kaya ini?" ujar Garbus.

= "Parasaanku gundah gulana banar. Hatiku bujur-bujur

rasa hancur luluh," ujar Palui.

+ "Kisahakan Lui, kalu kawa kubantu. Bila aku kada kawa mambantu kaina kucariakan urang lain manulung ikam," ujar Garbus.

= "Sabujurnya aku supan mangisahakan karna ini rahasia rumah tangga, kisah laki bini," ujar Palui.

+ "Balaki babini itu biasa haja bahual, basasarikan tapi kalu kawa jangan sampai basarakan. Apalagi ikam hanyar haja balaki babini, balum satahun kawin dan bini ikam paharatan batianan ganal," ujar Garbus.

= "Sual bini batianan ganal itulah nang manjadi pikiranku banar," ujar Palui.

+ "Bujur Lui ai, aku dahulu wayah anak pamulaan kaya itu jua, bingung pikiran, rasa kasihan wan bini lalu disamping itu mamikirakan itu-ininya pulang. Nasihatku Lui ai, barilah semangat supaya bini ikam kada takutan, disangani hatinya, dihibur jangan sampai basasarikan. Ikam nyaman haja karna masih ada mintuha bibinian nang umpat maharagunya," ujar Garbus.

WAYAH tianan bini Palui sudah sambilan bulan labih, maka mintuhanya baucap supaya Palui jangan banyak bajalanan, bila guring jangan talalu janak dan bini supaya dihibur-hibur. Malamnya imbah mintuhanya batutuduh, bini Palui kasakitan parut.

- "Bini ikam itu parak banar baranak Lui ai, lakasi cari bidan baranak," ujar mintuhanya manyuruh Palui. Lalu imbah basalawar Palui langsung haja maninjak sapidanya mancari bidan.

Mula-mula Palui ka rumah bidan di hulu, lalu imbah sampai dan mambaca tulisan ngaran bidan, balum batakun inya babulik. Lalu inya tulak ka bidan disubarang tapi disubarang kaya itu jua, balum sampai batamuan inya babulik jua.

Karna marasa balum kawa mangiyau bidan di subarang itu lalu inya baputar ka bidan dihilir tapi imbah mambaca tulisan ngaran bidan, Palui kada jadi pulang mangiyau bidannya, lalu inya langsung bulik ka rumah.

- "Mana bidannya Lui? Kanapa lawas banar mangiyaunya, biasanya bidan itu asal digamit haja langsung datang manulung" ujar mintuhanya gagarunum.

="Anu ma’ai, ulun sudah jua mandatangi bidan Juriah, bidan Ambar dan bahkan ulun ka subarang sana ka rumahnya bidan Fariah, tapi samunyaan kada kawa dan bahalangan," ujar Palui sambil pina manggitir katakutanan.

- "Napa alasannya maka kada kawa Lui?" ujar mintuhanya.

= "Bidan-bidan itu katitiganya sama kaya bini ulun itu jua. Ulun baca ngaran bidan itu samunyaan babunyi: Bidan Baranak..... Bidan Baranak........ Karna ada tulisan bidan baranak itulah maka ulun kada wani mangiyaunya. Kasihan........" ujar Palui.

- "Palui, Palui, bidan baranak itu artinya bidan nang manulungi urang baranak, kadanya bidannya nang baranak" ujar mintuhanya. "Itu nah........ lihati bini ikam sudah kutulungi, anak ikam lalakian mudahan kada bungul bangaknya kaya ikam jua," ujar mintuhanya manyindir.

= "Alhamdulillah......... sakalinya mintuhaku bidan baranak jua," ujar Palui basyukur.